福士推復古麵包電動車！

德國汽車出名高質，而福士汽車最近公開的「I.D. Buzz」電動車就以 1950 年面世的復古麵包車為藍本，加入高端技術，成為未來型汽車，車迷勢必入手！

「I.D. Buzz」麵包車日前在美國加州落地試車，隨即成為熱話，因為外型非常復古，係福士汽車的經典款式，暫時公開的顏色只有黃色。

新款麵包車屬於電動車，內置 111 kWh 的電池裝置，有自動無線充電功能，只需 30 分鐘就可充 80% 電，都幾方便。每次充電可行走 270 英里，而最高時速達 99 英里，環保得嚟又夠快！

車內空間非常闊敞，最多可容納 8 人，似足豪華七人車。地面有推軌，可展開座椅變成一張床，方便長時間搭車時補眠，連司機座都可 180 度旋轉！

今次仲引入第三級自動駕駛技術，即自動駕駛系統會完成所有一般的駕駛操作，只有在特定情況下，駕駛者先需要親自操作。車內裝有 10 個雷射感測器偵測駕駛時可能遇到的危險，仲有個性化系統「ID Pass」，儲存駕駛者和乘客所選擇的音樂、座位和溫度，並根據他們的喜好自動調整。其他的「神奇」設計包括伸縮方向盤、以 tablet 取代中控台、用相機代替倒後鏡等。官方指 2022 年會投入生產，而家儲定錢買就啱喇！

（圖︰網上圖片）

U Travel 原文：https://bit.ly/2M7VKwZ